ट्रम्प–पुटिन दुई घन्टा फोन संवाद: युद्धविराम अझै टाढा, आशा र आशंका दुवै बाक्लिँदै

अमेरिकी पूर्वराष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिनबीच सोमबार भएको दुई घन्टा लामो टेलिफोन वार्ताले युक्रेन युद्धको अन्त्यतर्फ केही संकेत दिए पनि तत्काल युद्धविरामको कुनै ठोस सहमति नजोडिएको देखिएको छ। ओभल अफिसबाट संवाद गरेका ट्रम्पले वार्तालाई “सकारात्मक भावना” भएको भन्दै सफल भने पनि पुटिनले स्पष्ट रुपमा युद्धविरामबारे कुनै प्रतिबद्धता जनाएनन्।

Photo of the Remarkables mountain range in Queenstown, New Zealand.

वार्ताका क्रममा ट्रम्पले पुटिनलाई सोधे, “हामी कहिले यो रक्तपात अन्त्य गर्ने?” तर पुटिनले त्यस्तो प्रश्नमा स्पष्ट उत्तर नदिएको बताइएको छ। वार्तापछि पत्रकारहरूसँग कुरा गर्दै ट्रम्पले भने, “यदि मलाई लाग्थ्यो कि पुटिन युद्ध अन्त्य गर्न चाहँदैनन् भने म वार्ता नै गर्ने थिएन। तर मलाई लाग्छ अब उनलाई पर्याप्त भएको छ।”

पुटिनले भने वार्तालाई “अर्थपूर्ण र स्पष्ट” भने पनि त्यसबाट तत्काल शान्ति स्थापना हुने संकेत देखिएको छैन। युक्रेनले प्रस्ताव गरेको ३० दिनको युद्धविरामलाई रुसले अस्वीकार गरिसकेको छ। यद्यपि ट्रम्पको भनाइमा, दुबै पक्ष ‘तात्कालिक रूपमा वार्ता सुरु गर्न सहमत’ भएको उल्लेख गरिएको छ।

यो संवाद पुटिन सोचीस्थित एक विद्यालय भ्रमणका क्रममा गरेका थिए भने ट्रम्पले सामाजिक सञ्जालमा पूरै ठूलो अक्षरमा लेख्दै संवादबारे पूर्वघोषणा गरेका थिए। यो वर्षकै तेस्रो टेलिफोन वार्तामा दुबै नेताले फरक दृष्टिकोण प्रस्तुत गरे, जसले द्वन्द्व अन्त्यको प्रक्रिया अझै जटिल छ भन्ने संकेत गर्छ।

ट्रम्पले भने, “यदि केही भएन भने म पछि हट्छु, अनि उनीहरू आफैंले जुधिरहनुपर्ने हुन्छ।” तर त्यही दिन रुसले युक्रेनमाथि ड्रोन र क्षेप्यास्त्र आक्रमणलाई तीव्र बनाएको थियो। यिनमा राजधानी कीभ समेत निशानामा परेको बताइएको छ।

वार्तापछि युक्रेनी राष्ट्रपति भोलोदिमिर जेलेन्स्कीले पनि ट्रम्पसँग दुईपटक फोनमा संवाद गरेका थिए—एकपटक पुटिनसँगको वार्ता अघि र एकपटक पछि। जेलेन्स्कीका अनुसार, ट्रम्पसँगको संवादपछि युरोपेली नेताहरूबीच रुसमाथि थप प्रतिबन्धको प्रस्ताव अघि सारिएको छ। उनले भने, “संयुक्त राज्य अमेरिकाले अझै दबाब बढाउन आवश्यक छ।”

ह्वाइट हाउसकी प्रेस सचिव क्यारोलिन लिभिटका अनुसार ट्रम्प दुवै पक्षको अडानप्रति केही निराश देखिएका छन्। “राष्ट्रपति युद्धविराम र द्वन्द्व अन्त्यमा केन्द्रित छन्,” उनले भनिन्।

ट्रम्पले यस संवादबारे युरोपेली आयोग प्रमुख उर्सुला भन डर लायेन, फ्रान्सेली राष्ट्रपति म्याक्रों, जर्मन चान्सलर मर्ज, इटालियन प्रधानमन्त्री मेलोनी, फिनल्यान्डका राष्ट्रपति स्टब र पोपको प्रतिनिधित्वमा भ्याटिकनलाई जानकारी गराएको दाबी गरे।

युद्धपछि अमेरिका–रुस व्यापारको सम्भावनाबारे ट्रम्पले भने, “यसले ठूलो मात्रामा रोजगारी र सम्पत्ति सिर्जना गर्न सक्छ। यसको सम्भावना असीमित छ।” उनले युक्रेनसमेत व्यापारिक लाभार्थी बन्ने विश्वास व्यक्त गरे।

यद्यपि अहिलेका लागि, युद्धविराम अझै टाढा देखिन्छ। वार्ता सकारात्मक भए पनि परिणामत: निष्कर्षविहीन देखिएको छ। आगामी वार्ताका सम्भावित स्थानहरूमा टर्की, स्विजरल्याण्ड र भ्याटिकन चर्चामा छन्।

Spread the love by sharing this news