एमालेका दुई भ्रातृ संगठन महाधिवेशनको चटारोमा, नेतृत्व चयनको तयारी तीव्र

काठमाडौं — नेकपा (एमाले) का दुई प्रभावशाली भ्रातृ संगठन — राष्ट्रिय युवा संघ नेपाल र अनेरास्ववियु — महाधिवेशनको अन्तिम तयारीमा जुटेका छन्। आगामी जेठ महिनाभित्र दुबै संगठनले नयाँ नेतृत्व चयन गर्दै रणनीतिक दिशा तय गर्ने छन्।

राष्ट्रिय युवा संघ नेपालको दशौँ राष्ट्रिय महाधिवेशन जेठ ९ देखि ११ गतेसम्म कास्कीको पोखरामा सम्पन्न हुने तय भएको छ। यता, अनेरास्ववियुको २४ औँ राष्ट्रिय महाधिवेशन जेठ २५ देखि २७ गतेसम्म कीर्तिपुरमा आयोजना गरिने छ।

महाधिवेशन मिति नजिकिएसँगै संगठनहरू आन्तरिक तयारीमा तीव्र गतिमा जुटेका छन्। महाधिवेशनलाई लक्षित गर्दै आकांक्षीहरू लबिङमा सक्रिय भएका छन्, जसले संगठनभित्र नेतृत्व चयनलाई प्रतिस्पर्धात्मक बनाउने अनुमान गरिएको छ।

युवा संघले यसपटकको महाधिवेशनको मूल नारा ‘शिक्षा, सीप र स्टार्टअप युवाको त्रिशक्ति’ तय गरेको छ। यसले युवालाई उद्यमशीलता र सृजनशील क्षमतातर्फ अभिमुख गराउने सन्देश दिन खोजिएको छ।

त्यस्तै, अनेरास्ववियुले ‘शिक्षालाई सीप, श्रम, उत्पादन र रोजगारीसँग जोडौँ, सामाजिक अराजकता र बढ्दो युवा पलायन रोक्न विद्यार्थी शक्ति समृद्धिमा अघि बढौँ’ भन्ने मूल नारा तय गर्दै विद्यार्थी आन्दोलनलाई समसामयिक चुनौतीसँग जोड्ने संकेत दिएको छ।

महाधिवेशनमार्फत संगठनहरूको भावी कार्यदिशा, नीति तथा रणनीति निर्धारण हुने भएकाले एमाले नेतृत्वका लागि पनि यी महाधिवेशनहरू रणनीतिक हिसाबले महत्वपूर्ण हुनेछन्।