विराटनगर, वैशाख १९ : विराटनगरमा सुरु भएको कोशी लगानी सम्मेलन पारदर्शिता अभावको आरोपमा विवादमा परेको छ। बहुप्रचारित सम्मेलनमा सीमित सञ्चारमाध्यम मात्रलाई प्रवेश दिइएको भन्दै स्वतन्त्र पत्रकार, सर्वसाधारण मिडियाकर्मी र केही जनप्रतिनिधिहरूलाई कार्यक्रमस्थलबाहिरै रोकिएको गुनासो आएको छ।
स्वतन्त्र पत्रकारहरूले ‘चुनिएका’ मिडियालाई मात्र सहभागी गराइएर अन्यलाई निषेध गर्नु संविधानले सुनिश्चित गरेको प्रेस स्वतन्त्रता र सूचनाको अधिकारविपरीत भएको दाबी गरेका छन्। उनीहरूको भनाइमा, कार्यक्रम नियोजित रूपमा दलका कार्यकर्ता, सरकारी अधिकारी र निकट मिडियालाई लक्षित गरिएको जस्तो देखिएको छ, जसले सम्मेलनको पारदर्शिता र समावेशीतामा प्रश्न उठाएको छ।
विश्लेषकहरूका अनुसार यस्तो भेदभावले लगानी सम्मेलनप्रति आम जनताको विश्वासमा कमी ल्याउन सक्छ। उनीहरूले विकास र लगानी प्रवर्द्धनको नाममा सञ्चारको पहुँच नरोध्न आग्रह गरेका छन्।
प्रधानमन्त्री केपी शर्मा ओलीले उद्घाटन गरेको सम्मेलनमा मुख्यमन्त्री हिक्मतकुमार कार्कीले निजी क्षेत्रको वारेस बन्न प्रदेश सरकार तयार रहेको र कानुनी सुधारमार्फत लगानीमैत्री वातावरण सिर्जना गरिएको बताए। ८ वटा क्षेत्रमा आधारित ७१ परियोजनाहरू एक वर्षको छलफलपछि छनोट गरिएको र निजी क्षेत्रले सकारात्मक प्रतिक्रिया दिएको जनाइएको छ।
दुई दिनसम्म चल्ने सम्मेलनले कोशी प्रदेशमा आर्थिक सम्भावनालाई उजागर गर्ने लक्ष्य राखेको छ। तर पारदर्शिता र पहुँचमा देखिएको विभेदले सम्मेलनको उद्देश्यमाथि गम्भीर प्रश्न उठाएको छ।
