श्रीकृष्ण जन्माष्टमीमा विराटनगरको राधाकृष्ण मन्दिरमा भक्तजनको ठूलो भीड

विराटनगर, ३० साउन । श्रीकृष्ण जन्माष्टमीको पावन अवसरमा विराटनगरस्थित राधाकृष्ण मन्दिरमा बिहानैदेखि भक्तजनहरूको ठूलो भीड लागेको छ। तीनपैनीस्थित मन्दिरमा कृष्ण भगवानको दर्शन र पूजा अर्चनाका लागि भक्तजनहरू बिहान सबेरैदेखि लाइनमा उभिएका छन्।

मन्दिर वरिपरि धार्मिक माहोल अत्यन्त उत्साहपूर्ण देखिएको छ। भजन–कीर्तन, धूप–दीप र फूलमालाले मन्दिर परिसरलाई आकर्षक बनाएको छ भने दर्शनार्थीहरू आ–आफ्नो पालो कुरेर कृष्ण भगवानलाई प्रसाद चढाइरहेका छन्।

धार्मिक श्रद्धा र आस्थासहित भक्तजनहरूले कृष्णलाई न्याय, धर्म र सत्यको प्रतीकका रूपमा पूजा गरिरहेका छन्। यसै अवसरमा देशका विभिन्न मन्दिरहरूमा समेत भक्तजनहरूको उल्लेख्य भीड लागेको जनाइएको छ। विराटनगरमा विगत वर्षहरूजस्तै यस वर्ष पनि कृष्ण जन्माष्टमी उल्लासपूर्वक मनाइँदैछ।