विराटनगर, १७ साउन ।
भारत हुँदै हङ्कङ लैजाने बहानामा मानव तस्करीमा परेका सात नेपाली किशोरीको भारतीय प्रहरीले झापा सीमास्थित पानीटङ्की नाकाबाट उद्धार गरेको छ । उनीहरूलाई अवैध रूपमा भारत लैजान खोज्ने दुई जना तस्कर पनि पक्राउ परेका छन् ।
माइती नेपाल कोशी प्रदेश संयोजक गोविन्द घिमिरेका अनुसार, उद्धार गरिएका सबै किशोरीहरू सङ्खुवासभा जिल्लाका हुन् । भारतको पश्चिम बंगाल अन्तर्गत दार्जीलिङस्थित तोरीबारी निवासी ४१ वर्षीय दिपेश गुरुङ र सङ्खुवासभाको मकालु गाउँपालिका–३ का ६१ वर्षीय जपन गुरुङले ती किशोरीहरूलाई वैदेशिक रोजगारीको प्रलोभन देखाउँदै काँकडभिट्टा हुँदै भारतीय भुमि प्रवेश गराएका थिए ।
तस्करहरूले किशोरीहरूलाई हङ्कङ लैजाने भन्दै नक्कली कागजात तयार पार्न भारतको सिलिगुढी लैजाँदै गर्दा भारतीय प्रहरीले पानीटङ्की नाकामा उनीहरूलाई नियन्त्रणमा लिएको हो । ती किशोरीहरूको आधार कार्डलगायतका कागजात बनाउने योजनामा रहेको खुलासा भएको छ ।
उद्धारपछि किशोरीहरूलाई भारतीय खोरीबारी प्रहरी थानामा राखिएको छ । उनीहरूलाई नेपाल फिर्ता गराउन माइती नेपालका संयोजक घिमिरेको नेतृत्वमा टोली पानीटङ्की पुगे पनि कानुनी प्रक्रिया पूरा नहुँदासम्म फिर्ता सम्भव नहुने जनाइएको छ ।
यसबीचमा, नेपाली पक्षले औपचारिक जानकारी नपाएको इलाका प्रहरी कार्यालय काँकडभिट्टाले जनाएको छ । अहिले उद्धार गरिएका किशोरीहरूको स्वास्थ्य परीक्षण तथा कानुनी सहयोगका लागि माइती नेपाल र भारतीय निकायबीच समन्वय भइरहेको छ ।
मानव तस्करीविरुद्ध सक्रिय माइती नेपालले यो घटनालाई गम्भीर अपराधको रूपमा लिँदै किशोरीहरूको सुरक्षित फिर्ती र दोषीलाई कडा कारबाहीको माग गरेको छ ।
