विराटनगर, १ असार । संघीय संसद्को प्रतिनिधि सभामा आइतबार पनि तनावपूर्ण दृश्य देखिएको छ । राष्ट्रिय प्रजातन्त्र पार्टी (राप्रपा) का सांसदहरू बैठक बहिष्कार गर्दै संसद् छाडेर बाहिरिएका छन् । त्यसअघि उनीहरू आफ्ना आसनमै उभिएर विरोध जनाइरहेका थिए । संसद् बैठक अवरुद्ध बनाउने उद्देश्यसहित राष्ट्रिय स्वतन्त्र पार्टी (रास्वपा) का सांसदहरूले वेल घेरेर प्रदर्शन जारी राखेका छन् ।
संसद् बैठकको कार्यसूची अघि बढाउने सभामुख देवराज घिमिरेको निर्णयसँग असन्तुष्ट हुँदै राप्रपाका सांसदहरू बैठकबाट बाहिरिएका हुन् । सभामुख घिमिरेले कार्यसूची अघि बढाएपछि राप्रपाले विरोध स्वरूप संसद् बहिष्कार गरेको हो ।
बैठकमा अर्थमन्त्री बार्षिक आय–व्यय विवरण प्रस्तुत गर्न रोष्ट्रममा पुगेका बेला एकीकृत समाजवादीका वरिष्ठ उपाध्यक्ष राजेन्द्र पाण्डेले सभामुखको ध्यानाकर्षण गराउँदै अवरोधको अवस्थाबीच कार्यसूची अघि नबढाउन आग्रह गरेका थिए । तर, सभामुखले आकस्मिक समय सञ्चालन गर्दै संसद् अघि बढाएका छन् । हालसम्म अवरोध अन्त्यको सम्भावना देखिएको छैन ।
